الفنان إدوارد يكشف عن أول يوم بعد إصابته بكورونا

كشف الفنان إدوارد، عن تطورات حالته الصحية بعد إصابته بفيروس كورونا المستجد «كوفيد - 19»، من خلال منشور كتبه عبر حسابه الشخصى على موقع «فيسبوك»، شرح من خلاله تفاصيل الأعراض التى مر بها فى ليلته الأولى من الإصابة.

وكتب إدوارد: «هحكيلكوا على أول ليلة مع الكورونا بما أنها أول مرة تجيلى وطلعت منها بإيه، ليلة صعبة جدا تعب فى الجسم زى ما يكون حد بيعذبك وبيدوس على كل حته فى جسمك وصداع نفسك يغمى عليك عشان تخلص منه ورعشه فظيعة، طول الليل بقول يارب».

وتابع إدوارد: «مش هنكر فى لحظة فكرت فى الموت والناس اللى ماتت من الكورونا، صدقونى ماخوفتش من الموت خوفت على مراتى وولادى وعيلتى، وإنهم مسئولين منى ولازم أبقى موجود عشانهم ولازم أصلى لربنا عشان يقومنى أكمل وحسيت إنى فقدت شغف كل متع الحياة"، وتابع: "مش عاوز حاجة، عاوز أكون كويس عشانهم، بس أنا من النوع اللى بحب الناس وبحب الحياة وبحب الأصحاب، انبسط كتير أوى لما لقيت ناس كتير سألوا عليا أعرفهم وماعرفهمش وعاوزين يساعدونى فى محنتى بأى شكل، ومنهم فنانين كبار بجد وإعلاميين كبار بجد، ربنا يباركلكم فى صحتكم وعيلتكم».

وأضاف إدوارد: «كمان اكتشفت قد إيه مراتى أنا غالى عندها موش همها كورونا ولا موش كورونا، قاعدة جنبى تعملى كل حاجة تريحينى قد إيه أنتى ست عظيمة جالك كورونا ومقولتليش السنة اللى فاتت عشان كنت بشتغل وموش عاوزة تشغلينى بيكى، مكنتش عارف إنها صعبة للدرجة دى، بجد انتى جبل إنكً استحملتى وكنتى واقفة كمان تخدمينا وتشوفى طلباتنا.. أنا اسف إنى محستش بيكى فى الوقت ده، أوعدك أقوم وأعوضك عن كل ده، الحياة موش مستاهلة غير إنك تعيش مع ناس بتحبها وتحبك وتخاف عليك، دى الخلاصة إنى فقدت الشغف فى متع الحياة عاوز أعيش مستور أنا وعيلتى ويكون حواليا ناس بحبها وبتحبنى ونتمنى لبعض الخير وبس فى ليلة واحدة الدنيا علمتنى كتير ربنا يبعد عنكم اى حاجه وحشه».