فيديو لميس الحديدي عن طفل المرور ابن المستشار: سلوكه متعلمه من البيت
لميس الحديدي عن طفل المرور ابن المستشار: السلوك ده متعلمه في البيت، حيث أكدت أن طفل المعادي "عيل ماشفش رباية"، وذلك في إطار تعليقها على حادثة طفل المعادي المعروفة إعلاميا بـ"طفل المرور"، و"ابن المستشار"، والذي قاد سيارة واستهزأ من امين شرطة، ثم صدمه.
وقالت لميس الحديدي في برنامجها «كلمة أخيرة» المذاع على قناة «ON»، مساء أمس الأحد: «النيابة النهاردة حققت وعرفت التفاصيل وأبو الولد طلع بايع العربية لحد من أصدقائه ويبدو أن الولد عارف الشخص اللي إشترى العربية وأنا مش عاوزة أقول سرق، عاوزة أكون حريصة في الكلام، هو أخد مفاتيح صاحب العربية من خلال ابنه ونزلوا في شوارع المعادي».
وتابعت: «ظهر فيديو النهارده تاني النهارده بيستهزئ بشرطي آخر بيقول له إنت واقف كده ليه؟ بشكل فيه سطوة، وقرار النيابة بضرورة تقويم الطفل ومش عاوزة أقول علاجه لأنهم اكتشفوا أنه مدلل جدا، وقامت بتسليمه لأهله ويجب تقويمه، وأنا هنا عاوزة أتكلم عن السلوك مرة تانية، امبارح أنا قلت على الولد إنه عيل ناقص رباية والحقيقة إن المشكلة دي لازم يدفع تمنها والدا الطفل أبوه وأمه؛ لأنه مش عارف الفرق بين الكبير والصغير».
وكشفت أن «حالة السلطوية اللي بيتكلم فيها في الفيديو واضح إنها موجودة في البيت أصلًا، الولد سرق العربية أولًا، وبعدين اتكلم مع ضابط الشرطة بسلطوية غير معهودة، وأنا أظن أن الأب والأم محتاجين يقفوا مع نفسهم وقفة؛ لأن الولد لو لم يُقوم سلوكه هيكبر وهيبقى أسوأ من كده، دانتو هتشوفوا البدع شكل تاني».
وواصلت "أنا آسفة.. السلوك ده متعلمه في البيت. ما هو العيل ده تربية بيته أبوه وأمه، وده سلوك متاخد من البيت. هو الأب بيتعامل كده ليه؟ هو بيعامل البيت والناس اللي حواليه كده؟ وماتكلمونيش عن طفل مدلل ولا مش مدلل، هذا كلام لا يستقيم مع القانون ".
