أسئلة شائعة عن تنسيق الثانوية العامة
الجمعة 22/يوليه/2022 - 05:15 م
ندا مازن
طباعة
◼️ س/ لو أنا مأجل أو قاسم 3 ثانوي من السنه اللي فاتت تنسيقي هيكون علي أنهي سنه السنه اللي فاتت ولا السنه دي ؟
🔸 ج/ التنسيق عموما بيكون علي تخرجك من ثانويه عامه وانك خلصتها في السنه اللي تميت فيها ، ف هيكون تنسيقك علي السنه دي مع الدفعه الجديده لانك خلصت ثانويه السنه دي.
◼️ س/ هل تنسيقي هيكون زي تنسيقهم بنفس المعايير اللي هما خلصوا بيها السنه ولا هنسق بتنسيق السنه دي بس علي معايير السنه اللي فاتت ؟
🔸 ج/ الناس اللي مأجله او قاسمه هتنسق علي السنه دي عن مسألة طلاب التقسيم زي ما قال الوزير :
يتم التنسيق بين وزارتى التربية والتعليم والتعليم الفني ووزارة التعليم العالي والبحث العلمي للمحافظة على حقوق كل الطلاب دون الإخلال بالقوانين وليعلم طلاب هذا العام وذويهم أن طلاب التقسيم لن ينافسوهم على اماكن الجامعات وفي نفس الوقت طالب التقسيم المجتهد سوف ياخذ حقه الطبيعي ايضا دون استحداث تنسيق مستقل او الإخلال بحقوق الطرفين.
◼️ س/ لو أنا طلعت من ثانويه بمادتين أو أكتر هل يحق ليا إني أدخل دور تاني ؟
🔸 ج/ يحق ليك انك تدخل دور تاني طالما معاك ماده أو اتنين فقط لا غير ، لان مفيش سماح بدخولك دور تاني لو معاك أكتر من مادتين ، ف الناس اللي معاها 3 مواد وأكتر ملهمش دخول دور تاني وهيضطروا انهم يعيدوا السنه بالمواد اللي معاهم.
◼️ س/ طب هل ينفع إني أقدم علي تظلم لو معايا أكتر من مادتين يعني مثلا 3 مواد علي الأقل علشان أخد درجات في ماده وأقدر أدخل الاتنين الباقيين دور تاني ؟
🔸 ج/ ينفع تقدم علي تظلم لو معاك كل المواد مش شرط ماده ولا اتنين ولا حتي تلاته ، المهم انك تبدأ تقدم علي طلب التظلم لانه بيكون لمده محدده وبعدها بيقفل وبيتم مراجعه طلبك ومفيش حد يقدر يقولك إذا كنت هتاخد في ماده درجات أم لا ، ف سارع بإنك تقدم بالطلب وتعمل اللي عليك وادعي ربنا إنه ينصفك.
◼️ س/ لو معايا أكتر من مادتين هل بعيد السنه بالمواد كلها تاني ولا بالمواد اللي طلعت بيها بس ؟
🔸 ج/ الإعادة بالمواد اللي طلعت بيها بس ، مش هتمتحن في المواد اللي نجحت فيها تاني ، يعني لو معاك 3 مواد رسوب ف هتعيد السنه علي ال 3 بس فقط.
◼️ س/ بعد الدور التاني هل درجتي في ماده ما بتزيد ، ولو بتزيد بتزيد كام % ؟
🔸 ج/ ايوه بتزيد درجتك ، هتزيد درجتك بنسبه معينه علي حسب الدرجات اللي ناقصها في الماده .. يعني مثلا لو ناقص في الماده 10 درجات احسب علي كل 4 درجات 1 % ف هتزيد فوق مجموعك ب 1 أو 2 % فقط لا غير.
◼️ س/ اي الفرق بين كلمه رسوب ودور تاني في شهاده الثانويه ؟
🔸 ج/ رسوب أكثر من مادتين يعني هتعيد السنه بالمواد اللي طلعت بيها ، أما دور تاني مادتين فقط فيحق ليك تدخلها دور تاني.
◼️ س/ هل لو انا جايب مجموع قليل السنه دي مش هلحق كليه ؟
🔸 ج/ لا يعلم الغيب إلا الله ، السنه دي التنسيق أقل من كل السنين اللي فاتت ، ف هيكون فيه تلائم بين التنسيق والدرجات من حيث الأقليه.
◼️ س/ لو دخلت دور تاني هل هاخد الدرجه كامله ولا نصها ؟
🔸 ج/ هتاخد نص الدرجه طالما مفيش عذر لدخولك دور ثاني بشهاده مرضيه أو انك مأجل الماده ف هتمتحنها ولكن لو قفلت الماده وجيبت فيها الدرجه النهائيه هتاخد النص برضو ، يعني مطالب منك تعدي النص بس لانك كدا كدا مش هتاخد أكتر من النص.
◼️س/ عملت تظلم وجالى درجات فى التظلم أعمل اى ؟
🔸 ج/ لازم تروح الكنترول على طول و معاك استماره الدرجات علشان يتم التعديل.
◼️ س/ طب كتابه الرغبات غير التنسيق ولا اى ؟
🔸 ج/ أول حاجة فى المرحله الأولى كتابه الرغبات بتستمر ٣ أيام ل ٥ ايام بعد كدا يقفل الموقع وننتظهر نتيجه التنسيق ( اللى هو هتقبل فى كلية اى يعنى )
بعد كدا تبدأ عملية التحويل و تقليل الاغتراب.
◼️ س/ لازم علشان نقدم فى الكلية ننتظر الثلاثه مراحل ؟
🔸 ج/ لا بمجرد انتهاء كل مرحله ومعاك بطاقه الترشيح تقدر تروح تقدم.
◼️ س/ اى هيا بطاقه الترشيح ؟
🔸 ج/ بطاقه الترشيح دى زى ما قولت هتكتب رغباتك وبعدين يظهر التنسيق ولما نتيجه التنسيق تظهر هتدخل على الموقع يقول تم ترشيحك للكليه كذا ( اتقبلت فيها يعنى الكترونى ) الورقه دى هيا بطاقه الترشيح تطبعها وتبقى معاك للتقديم.
◼️ س/ المرحله التالته هتبدا بعد الدور التانى ولا قبل الدور التانى ؟
🔸 ج/ بتختلف من سنه للتانيه فى سنين فتحت قبل الدور التانى للناس اللى مفيش معاها دور تانى و قفلت وفتحت تانى بعد الدور التانى
وفى سنين بتنتظر الدور التانى.
◼️ س/ طب أنا مجموعي كبير بس مأجل ماده بكامل الدرجة و كدا هبقى مرحله تالته و المفروض أدخل كليه من المرحله الأولى أو التانيه ؟
🔸 ج/ هتدخل مرحله تالته اه بس هتلاقى عندك فى الرغبات كليات من المرحله الأولى والتانيه حسب مجموعك حتى لو جايب طب.
◼️ س/ ينفع التحويل وتقليل الاغتراب يفتح لمرحلتين مع بعض ؟
🔸 ج/ اه ينفع وحصلت قبل كدا المرحله الأولى والتانية
◼️ س/ القاهره والجيزه نظام جغرافى واحد ؟
🔸 ج/ اه الاتنين نفس التوزيع الجغرافى و بيضموا جامعة عين شمس والقاهره وحلوان.
◼️ س/ طب أنا مواليد 2001 أجيب 2 جند ولا 6 جند ؟ 🔸 ( للذكور فقط )
🔸 ج/ الناس اللى مواليد 2001 فيما قبله لازم تجيب ال 2 جند وال 6 جند دول ضمن ملف التقديم للكلية.
◼️ س/ ال 2 جند وال 6 جند منين ؟
🔸 ج/ ال 2 جند من مركز الشرطه التابع اللي انت تابع له ( أى حد يجيبها عادى )
ال 6 جند من منطقه التجنيد ( لازم الطالب بنفسه )
محتاج وأنت بتجبهم صوره البطاقه.
◼️ س/ هو انا ينفع أحول من كلية لكلية تانيه ؟
🔸 ج/ اه في حاجة اسمها تحويل غير مناظر لما تقليل الاغتراب يفتح
يعنى مثلا من تجاره لحقوق بس شرط تكون جايب المجموع.
◼️ س/ هو أنا لو جبت كلية فى محافظه تانيه ينفع أحول لمحافظتى ؟
🔸 ج/ اه ينفع و دا اسمه تقليل الاغتراب و كل ما يكون مجموعك قريب للمحافظه بتاعتك هتكون فرصتك أكبر فى القبول.
◼️ س/ لازم أكون مقفل الانجلش علشان أدخل كليات انجلش ؟
🔸 ج/ كل كلية بتحط درجه فى الانجلش يعني مثلا تجاره انجلش متقلش عن 46 مثلا ،،
بتختلف من جامعة لجامعة تانيه طب انت لو جايب 46 وفى ناس جايبه 48 هياخدوا اللى جايبين 48 الأول.
◼️ س/ لو أنا واخد الثانوى من محافظه غير محافظتى هدخل التوزيع الجغرافى تبع محافظه اى ؟
🔸 ج/ محافظه الإدارة التعليمية التابع لها.
